Milagros de Nuestra Señora - El milagro de Teófilo de Gonzalo de Berceo Del pleito de Teofilo vos querria fablar, Tan preçioso miraclo non es de oblidar, Ca en esso podremos entender e asmar, Que vale la Gloriosa qui la sabe rogar. Non querré, si podiero, la razon alongar, Ca vos avriedes tedio, io podrie peccar, De la oraçion breve se suele Dios pagar, A nos essa nos desse el Criador usar. Era un omne bono de granada façienda, Avie nomne Teofilo commo diz la leienda, Omne era pacifico, non amaba contienda, Bien sabie a sus carnes tenerlas so su rienda. En el logar do era contenie grant bailia, De su sennor el bispo tenie la vicaria, De los de la eglesia avie la maioria, Fuera que el obispo avie la nomnadia. Era en si misme de buena contenençia, Sabie aver con todos paz e grant avenençia, Omne era temprado de buena conoçençia, Era muy bien condido de sen e de çiençia. Vistie a los desnudos, apaçie los famnientos, Acogie los romeos que vinien fridolientos, Daba...