Milagros de Nuestra Señora - Un parto maravilloso de Gonzalo de Berceo De un otro miraclo vos queremos contar Que cuntió otro tiempo en un puerto de mar: Estonz lo entendredes e podredes iurar, La virtut de Maria que es cada logar. Entendredes en ello commo es la Gloriosa En mar e en terreno por todo poderosa: Commo vale aina, ca non es perezosa, E nunqua trovó omne madre tan pIadosa. Çerca una marisma, Tumba era clamada, Façiase una isla cabo la orellada, Façie la mar por ella essida e tornada, Dos veçes en el dia, o tres a la vegada. Dien dentro enna isla de las ondas çerquiella, De Sant Miguel era, avie una capiella, Cuntien grandes virtutes siempre en essa çiella, Mas era la entrada un pocco asperiella. Quando querie el mar contra fuera essir, Isie a fiera priessa, non se sabie sofrir: Omne maguer ligero, non li podrie foir; Si ante non issiesse, hi avrie a perir, El dia de la fiesta del arcangel preçioso Era el mar mas quedo, iaçie mas espaçioso, Udie...