Milagros de Nuestra Señora - El romero de Santiago de Gonzalo de Berceo Sennores e amigos por Dios e caridat, Oid otro miraclo fermoso por verdat: Sant Ugo lo escripso en Grunniego abbat Que cumtió a un monge de su soçiedat. Un fraire de su casa, Guirat era clamado, Ante que fuesse monge era non bien senado, Façie a las de veçes follia e peccado, Commo omne soltero que non es apremiado. Vinol a corazon do se sedie un dia Al apostolo de Espanna de ir en romeria: Aguisó su façienda, buscó su compannia, Destaiaron el termino commo fuessen su via. Quando a essir ovieron, fizo una nemiga: En logar de vigilia iogó con su amiga, Non tomó penitençia commo la ley prediga, Metiose al camino con su mala hortiga. Pocco avie andado aun de la carrera, Aves podrie seer la iornada terçera; Ovo un encontrado cabo una carrera, Mostrabase por bueno, en verdat non lo era. El diablo antigo siempre fo traydor, Es de toda nemiga maestro sabidor, Semeia a las veçes angel del...